రజినీకాంత్ సినిమా వస్తుందంటే ఫ్యాన్స్కి పండగే. అందులోనూ సంక్రాంతికి వస్తే ఆ హంగామా వేరే స్థాయిలో ఉంటుంది. ఇక ఎ.ఆర్.మురుగదాస్ లాంటి ప్రతిభావంతుడైన దర్శకుడి కాంబినేషన్లో రజినీ మూవీ అంటే అంచనాలు ఏ స్థాయిలో ఉంటాయో అర్థం చేసుకోవచ్చు. అందుకే, ఈరోజు అన్ని చోట్లా రజినీ మానియా నడుస్తోంది. అభిమానులు ఎప్పుడెప్పుడా అని ఎదురుచూసిన ‘దర్బార్’ మూవీ భారీ అంచనాల నడుమ గురువారం (జనవరి 9న) ప్రేక్షకుల ముందుకు వచ్చింది. ఉదయం 4 గంటల నుంచి ప్రపంచ వ్యాప్తంగా ప్రీమియర్ షోలు మొదలైపోయాయి. ‘దర్బార్’ ప్రీమియర్ షోలు చూసిన ప్రేక్షకులు ట్విట్టర్ ద్వారా తమ అభిప్రాయాలను వెల్లడిస్తున్నారు. ప్రస్తుతానికి వస్తోన్న టాక్ బట్టి చూస్తే బొమ్మ బ్లాక్ బస్టరే. అసలు ఇంట్రడక్షన్ ఫైటే అదిరిపోయిందట. సినిమా ప్రారంభం నుంచి ఇంటర్వెల్ వరకు ఓ రేంజ్లో పరిగెత్తిందని అంటున్నారు. ఒక్క సెకన్ కూడా బోర్ అనేది కొట్టకుండా రేసీ స్క్రీన్ ప్లేతో అలరించారట దర్శకుడు ఎ.ఆర్.మురుగదాస్. ఇక రజినీకాంత్ అయితే తన పవర్ఫుల్ యాక్షన్తో కట్టిపడేశారట. మళ్లీ అలనాటి రజినీని చూశామని ఫ్యాన్స్ సంబరపడిపోతున్నారు. రజినీకాంత్ ఎంట్రీ, అనిరుధ్ ఇచ్చిన బ్యాక్ గ్రౌండ్ స్కోర్, ఫైట్స్ గురించి చెప్పడానికి మాటలు సరిపోవని రజినీ ఫ్యాన్స్ ట్వీట్లు చేస్తున్నారు. ఫస్టాఫ్ చాలా సరదాగా, రొమాంటిక్గా, క్రేజీగా సాగిపోయిందని కొందరు ట్వీట్లు చేశారు. విలన్ సునీల్ శెట్టి పరిచయంతో ఇంటర్వెల్ కార్డ్ పడిందట. ఫస్టాఫ్ మొత్తం మంచి కమర్షియల్ ఎలిమెంట్స్తో విపరీతంగా ఆకట్టుకుంటుందని టాక్. ఇక సెకండాఫ్లో అసలు స్టోరీ మొదలవుతుందట. యాక్షన్ సీన్స్, సెంటిమెంట్ సీన్స్తో కట్టిపడేశారట దర్శకుడు మురుగదాస్. నివేదా థామస్తో రజినీకాంత్ సీన్స్ ప్రతి ఒక్కరినీ కంటతడి పెట్టిస్తాయట. నయనతార, రజినీ జంట వెండితెరపై చూడముచ్చటగా ఉందట. రజినీకాంత్ను సినిమాటోగ్రాఫర్ సంతోష్ శివన్ చాలా అందంగా, కలర్ఫుల్గా చూపించారట. ఈ వయసులోనూ స్క్రీన్ మీద రజినీ ఎంత బాగున్నారో అని ఫ్యాన్స్ మురిసిపోతున్నారు. సాంగ్స్ కూడా చాలా కలర్ఫుల్గా ఉన్నాయని అంటున్నారు. మొత్తంగా చూసుకుంటే ఒక మంచి సోషల్ మెసేజ్తో కూడిన కమర్షియల్ సినిమా ‘దర్బార్’ అని చెబుతున్నారు. రజినీకాంత్ ఇమేజ్కు తగిన కంటెంట్, కమర్షియల్ ఎలిమెంట్స్తో ఎ.ఆర్.మురుగదాస్ అదిరిపోయే సినిమాను అందించారని అంటున్నారు. మొత్తం మీద ఈ సంక్రాంతికి బ్లాక్ బస్టర్ సినిమా ఇచ్చారు తలైవా.
from Telugu Movie News | Movie News in Telugu | Movie Gossips in Telugu https://ift.tt/39S1CF9
No comments:
Post a Comment