స్వర్ణోత్సవ నటీమణి రోజారమణి.. ఆమె భర్త, నటుడు చక్రపాణి దంపతులు జీవిత సాఫల్య పురస్కారం అందుకున్నారు. అమెరికా గానకోకిల శారద ఆకునూరి నిర్వహణలో వంశీ ఇంటర్నేషనల్ ఇండియా, యునైటెడ్ కింగ్డమ్ తెలుగు అసోసియేషన్ సంయుక్త ఆధ్వర్యంలో ఇంటర్నెట్ ద్వారా ఈ ఆదర్శ దంపతుల జీవిత సాఫల్య పురస్కారం 2020ను అక్టోబర్ 17న , చక్రపాణి దంపతులకు అందజేశారు. , అమూల్య కలిసి తమ తల్లిదండ్రులకు స్వగృహంలోనూ శాలువాతో సత్కరించి జీవిత సాఫల్య పురస్కారం అందజేశారు. ఈ సందర్భంగా హీరో తరుణ్ మాట్లాడుతూ.. బాల్యంలో తన తల్లి ‘భక్త ప్రహ్లాద’లో నటించి జాతీయ పురస్కారం అందుకోవడం, అదే విధంగా తను కూడా ‘అంజలి’ చిత్రంలో బాలనడిగా జాతీయ పురస్కారం అందుకోవడం జీవితంలో మధుర స్మృతి అని అన్నారు. వంశీ సంస్థల వ్యవస్థాపకుడు శిరోమణి వంశీ రామరాజు స్వాగతం పలికిన ఈ సభలో యునైటెడ్ కింగ్డమ్ తెలుగు సమాఖ్య ట్రస్టీ డాక్టర్ వీపీ కిల్లి పరిచయ వాక్యాలు పలికారు. సభలో పాల్గొన్న పార్లమెంట్ మాజీ సభ్యుడు, సినీ నటుడు, నిర్మాత మాగంటి మురళీ మోహన్ మాట్లాడుతూ రోజారమణితో తాను ‘వస్తాడే మా బావ’, ‘భారతంలో ఒక అమ్మాయి’ చిత్రాల్లో నటించానని జ్ఞాపకం చేసుకున్నారు. రోజారమణి నటనా వైదుష్యాన్ని ప్రశంసించిన మురళీ మోహన్.. ఆమెను డబ్బింగ్ ఆర్టిస్టుగా తానే పరిచయం చేశానని గుర్తుచేశారు. 400 చిత్రాలకు పైగా సుహాసిని, రాధ, మీనా, విజయశాంతి వంటి హీరోయిన్స్కి రోజారమణి డబ్బింగ్ చెప్పారని తెలియజేశారు. అలాగే, తెలుగులో ఎన్టీఆర్ మాదిరిగా ఒరియాలో పౌరాణిక చిత్రాల్లో నటించి చక్రపాణి ప్రశంసలందుకున్నారని మురళీ మోహన్ అన్నారు. కాగా, గాయని శారద ఆకునూరి తన పాటలతో మాటలతో కార్యక్రమం ఆద్యంతం చక్కటి వ్యాఖ్యానంతో అలరించారు. ఇంకా ఈ కార్యక్రమంలో దర్శకుడు రేలంగి నరసింహారావు, తానా అధ్యక్షుడు జయశేఖర్ తాళ్లూరి, డాక్టర్ ప్రసాద్ తోటకూర, జయశ్రీ పీసపాటి (హాంగ్కాంగ్), విజయ గొల్లపూడి (ఆస్ట్రేలియా) ప్రసంగించారు. రోజారమణి, చక్రపాణి దంపతులు మాట్లాడుతూ.. తమ జీవితమంతా కళకు అంకితమైందని అన్నారు. కళలమయమైన జీవితం ఆనందాన్ని చేకూరుస్తుందని చెప్పారు. కార్యక్రమంలో చివరిగా జరిగిన సంగీత విభావరిలో రాధికా నోరి (అమెరికా), రాజేంద్రప్రసాద్ (వైజాగ్) తమ గానాన్ని వినిపించారు. ఈ కార్యక్రమాన్ని డాక్టర్ తెన్నేటి సుధ, శైలజా సుంకరపల్లి పర్యవేక్షించారు.
from Telugu Movie News | Movie News in Telugu | Movie Gossips in Telugu https://ift.tt/3oadARV
No comments:
Post a Comment